Óeirðir í Mósambík vegna hækkandi strætisvagnagjalda

Til óeirða kom í morgun í ýmsum borgum Mósambík, meðal annars í höfuðborginni Maputo, þegar þúsundir mótmæltu verðhækkun á fargjöldum strætisvagna á götum úti.

Löglegra beitti táragasi og skaut gúmmíkúlum að mótmælendum. Lögregla hefur staðfest að einn hafi látið lífið í óeirðunum. Fram kemur í tilkynningu frá Þróunarsamvinnustofnun Íslands að ástandið sé þó ekki alvarlegt og að ekkert ami að þeim Íslendingum sem stofnuninni sé kunnugt um í landinu.

Jóhann Pálsson, umdæmisstjóri ÞSSÍ í Mósambík, segir að mótælin hafi byrjað í morgun og frést hafi af óeirðum víða um borgina. „Gengið var um í hópum um margar aðalgötur borgarinnar og steinum hent í bifreiðar og hjólbarðar brenndir. Þykkur reykjarmökkur lá yfir miðborginni og skothríð heyrðist. Lætin munu þó hafa verið mun meiri í fátæktarhverfum borgarinnar," segir Jóhann í tilkynninu ÞSSÍ. Búist er við áframhaldandi mótmælum í Mósambík.