Tveggja ára barni hent af þriðju hæð brennandi húss

Tveggja ára barn lifði það af þegar foreldrar þess hentu því niður af þriðju hæð fjölbýlishúss í Ludwigshafen í Þýskalandi þar sem eldur kom upp í gær.

Ljósmyndarar náðu myndum af því þegar barninu var hent út en fyrir neðan beið slökkviliðsmaður og greip barnið. Fjölskyldan var öll föst inn í brennandi byggingunni eftir að stiginn í húsinn hrundi og horfðu skelfingu lostnir vegfarendur á þegar barninu var hent niður. Ekki er vitað um afdrif annarra í fjölskyldunni.

Tveimur öðrum börnum var bjargað úr brennandi húsinu með því að henda þeim út um glugga og þá björguðu slökkviliðsmenn einu til viðbótar úr brennandi húsinu.

Níu manns, þar af fimm börn, létu lífið í brunanum. Ekki er útlokað að fleiri finnist látnir í húsinu en ekki hefur verið hægt að fara inn í það vegna hrunhættu. Lögregla telur hugsanlegt að kveikt hafi verið í húsinu og þar hafi nýnasistar verið á ferð, en stærstur hluti íbúanna var Tyrkir.