Víkur ekki sæti í Björgólfsmáli

Ásgeir Magnússon héraðsdómari hefur úrskurðað að hann sjálfur skuli ekki víkja sæti í máli Björgólfs Guðmundssonar gegn Kristjáni Guðmundssyni. Björgólfur stefndi Kristjáni Guðmundssyni fyrrverandi sjómanni fyrir meiðyrði og vill að ummæli sem hann lét falla í grein sem birtist í Morgunblaðinu mánudaginn 29. október 2007 verði dæmd dauð og ómerk.

Kristján skrifaði meðal annars „Fyrrum ráðamaður í félaginu Hafskip hf. og sögulegum endalokum þess tekst með tilkomu Rússagulls að ná yfirhöndinni í hlutabréfaeign Hf. Eimskipafélags Íslands og leggja fyrirtækið síðan niður með yfirtöku dótturfélags Hf. Eimskipafélags Íslands, þe. Burðaráss ehf. Því hefur vaknað sú spurning hvort hér hafi verið um að ræða sykursæta hefndaraðgerð af hálfu fyrrverandi ráðamanns í Hafskip hf. að leggja vondan keppinaut niður til að sýna hver hefur valdið."

Stefndi krafðist þess að dómari viki sæti vegna þess að hann hafi ekki notið réttlátrar málsmeðferðar í tveimur málum sem rekin voru fyrir Héraðsdómi Reykjavíkur og hann var aðili að. Dómarinn komst hins vegar að þeirri niðurstöðu að ekki yrði fallist á það með stefnda að sjónarmið hans gætu leitt til þess að dómara í máli þessu bæri að víkja sæti.