Segist hafa farið að lögum í hvívetna við undirbúning álvers

Norðurál segist hafa farið í hvívetna efir lögum og reglum um framkvæmdir við undirbúning álvers í Helguvík og segist hafa gert samninga um flestalla þætti málsins. Þetta kemur fram í tilkynningu á félaginu.

Eins og fram kom í gær samþykktu bæjarstjórnir Garðs og Reykjanesbæjar framkvæmda- og byggingarleyfi fyrir álver í Helguvík. Þórunn Sveinbjarnardóttir umhverfisráðherra lýsti furðu sinni þeirri ákvörðun og benti á að kæra Landverndar vegna álversins væri enn til umfjöllunar hjá ráðuneytinu.

Norðurál segir í tilkynningu í dag að félagið hafi í fjögur ár unnið að undirbúningi álvers í Helguvík í mjög góðu samstarfi við sveitarfélög á svæðinu, orkufyrirtæki og opinberar stofnanir. Samningar hafi verið gerðir um svæði fyrir starfsemina, hafnaraðstöðu, orku og orkuflutning. Þá sé mati á umhverfisáhrifum lokið og búið að breyta aðal- og deiliskipulagi og byggingarleyfi hafi fengist í gær.

Um kæru Landverndar, sem telur að Skipulagsstofnun hafi átt að meta umhverfisáhrif álversins í heild sinni, segir Norðurál að vísa eigi henni strax frá. Er bæði vísað til þess að kæran hafi komið alltof seint og þá hafi árið 2006 farið fram ítarlegt samráðsferli vegna þessa atriðis að frumkvæði Skipulagsstofnunar með þáttöku Umhverfisstofnunar, orkuframleiðenda, sveitarfélaga og fleiri aðila. Niðurstaða þessa ferlis hafi verið að meta ekki allar framkvæmdir tengdar álverinu saman.

Þá er bent á að álit Skipulagsstofnunar um mat á umhverfisáhrifum álversins sæti ekki kæru til ráðherra og þar sem byggingarleyfi byggi á áliti Skipulagsstofnunar „verður ekki séð að umrædd kæra hafi nein áhrif á útgáfu byggingarleyfis og hefur Norðurál því haldið áfram vinnu við undirbúning verkefnisins samkvæmt áætlun," segir í tilkynningunni.