RÚV ætlar með launamál Þórhalls og Sigrúnar fyrir dómstóla

Ríkisútvarpið neitar að láta Vísi í té upplýsingar um laun dagskrárstjóra Ríkissjónvarpsins og dagskrárstjóra útvarps, þrátt fyrir að úrskurðarnefnd um upplýsingamál hafi úrskurðað að Ríkisútvarpinu sé skylt að veita þessar upplýsingar.

Í nóvember á síðasta ári óskaði Óskar Hrafn Þorvaldsson, ritstjóri Vísis, eftir upplýsingum um laun Þórhalls Gunnarssonar, ritstjóra Kastljóss og dagskrárstjóra Ríkissjónvarpsins, og Sigrúnar Stefánsdóttur, dagskrárstjóra Ríkisútvarpsins. Ríkisútvarpið neitaði að upplýsa um þetta og kærði Óskar því Ríkisútvarpið til úrskurðarnefndar um upplýsingamál. Þann 11. mars síðastliðinn úrskurðaði nefndin svo að Ríkisútvarpið skyldi veita kæranda, Óskari Hrafni, aðgang að ráðningarsamningi fyrirtækisins við Þórhall Gunnarsson og Sigrúnu Stefánsdóttur.

Bjarni Guðmundsson, aðstoðarmaður útvarpsstjóra, sagði í samtali við Vísi í morgun að Ríkisútvarpið hefði ákveðið að senda úrskurðarnefnd erindi þar sem þess verður óskað að réttaráhrifum úrskurðarins verði frestað, samkvæmt 18. grein upplýsingalaga. Þetta þýðir að Ríkisútvarpið mun bera úrskurð nefndarinnar undir dómstóla og óska eftir flýtimeðferð á málinu.