Setur skilyrði fyrir samruna á markaði fyrir fólksflutninga

Samkeppniseftirlitið hefur sett ákveðin skilyrði fyrir samruna Reynimels ehf. og Kynnisferða sem sinna fólksflutningum. Á vef stofnunarinnar kemur fram að hún hafi ógilt samrunann í fyrra þar sem hann hindraði samkeppni á markaði fyrir fólksflutninga.

Reynimelur var stofnaður af hópferðafyrirtækjunum SBA-Norðurleið og Hagvögnum/Hópbílum og keypti félagið Kynnisferðir af FL Group en Kynnisferðir sinna meðal annars akstri á Keflavíkurflugvöll.

Eftir að Samkeppniseftirlitið hafði hafnað samrunananum var send önnur tilkynning um kaup Reynimels á Kynnisferðum en með breyttu eignarhaldi. Í því fólst meðal annars að SBA-Norðurleið og tengdir aðilar, sem áður voru hluthafar í Reynimel, seldu sína eignarhluti í félaginu. Þetta þótti Samkeppniseftirlitinu ekki nóg og því hefði samruninn eftir sem áður skaðleg áhrif á samkeppni.

Í kjölfarið hófust viðræður sem leiddu til þess að Reynimelur hefur gengist undir sátt í málinu. Hún felur í sér skilyrði í þremur töluliðum sem meðal annars kveða á um frekari breytingar á eignarhaldi í Reynimel sem fela það í sér að Hagvagnar/Hópbílar muni ekki lengur hafa yfirráð yfir Reynimel og þar með ekki yfir keppinauti sínum Kynnisferðum. Þá mun fullur rekstrar- og stjórnunarlegur aðskilnaður vera á milli Hagvagna/Hópbíla annars vegar og Reynimels/Kynnisferða hins vegar.

Þessi skilyrði eru að mati Samkeppniseftirlitsins nægjanleg til þess að eyða þeim samkeppnislegu vandamálum sem ella hefðu skapast með samrunanum.