Lög um lífeyrisréttindi þingmanna eru hneyksli

Það er dæmigert skeytingaleysi þingmanna að frumvarp Valgerðar Bjarnadóttur um breytingar á lífeyrisréttindum þingmanna skuli hafa legið í þinginu svo mánuðum skipti. Þetta segir Grétar Þorsteinsson, formaður ASÍ.

Í frumvarpi Valgerðar er lagt til að alþingismenn, ráðherrar og hæstaréttardómarar njóti sömu lífeyriskjara og ríkisstarfsmenn, en búi ekki við sérstök forréttindi. Grétar segir að ASÍ hafi tekið skýra afstöðu gegn frumvarpi sem fól í sér aukin réttindi þessa starfsstétta þegar það var samþykkt árið 2003.

„Þessi lagabreyting sem þá átti sér stað var hneyksli og er það enn," segir Grétar. Grétar segir að ef þingmenn hefðu vilja til þess að afgreiða málið þá þyrfti það ekki að taka mikinn tíma. Í sama streng tekur Guðmundur Gunnarsson, formaður Rafiðnaðarsambandsins. Hann segir hreint út sagt með ólíkindum hvernig þingmenn hagi sér í þessu máli.