Saumavélasalar handteknir á Selfossi

Lögreglan á Selfossi stöðvaði sölu á saumavélum á Selfossi í gær. „Ástæðan var beiðni frá Neytendastofu um að kanna heimild erlendra aðila til sölu á saumavélunum frá þekktum framleiðanda," segir í á heimasíðu lögreglunar á Selfossi. „Aðdragandi málsins var sá að erlendir aðilar höfðu flutt inn hátt á fimmta hundrað saumavéla til landsins sem þeir ætluðu að selja á fjórum dögum. Salan fór fram í Reykjavík, Hafnarfirði og á Selfossi. Saumavélarnar og sölustaðir voru auglýstir opinberlega."

Salan mun hafa hafist á höfuðborgarsvæðinu en síðan hafi saumavélasalarnir fært sig á Selfoss. Þeir höfðu selt tæplega helming þeirra saumavéla sem þeir höfðu flutt inn þegar lögreglan á Selfossi skarst í leikinn en þó hafði þeim tekist að selja tvær vélar í bænum. Sölumennirnir, sem voru þrír, voru færðir á lögreglustöð þar sem saumað var að þeim.

„Í yfirheyrslum báru þeir að hafa leitað til viðurkenndra opinberra aðila auk einkafyrirtækja og fengið ráð og leiðbeiningar um hvernig standa ætti að sölunni," segir lögreglan. Rannsókn málsins stendur nú yfir en sölumennirnir eru grunaðir um að hafa brotið gegn lögum um verslunaratvinnu. „Aðilar þessir hafa áður komið hér til lands til sölu á saumavélum og mun lögregla og opinberir aðilar þá hafa haft afskipti af þeim en ekkert aðhafst."