Mutu þarf að greiða Chelsea tvo milljarða

Alþjóða Knattspyrnusambandið hefur skipað rúmenska framherjanum Adrian Mutu að greiða Chelsea á Englandi um tvo milljarða í miskabætur. Mutu var látinn fara frá félaginu árið 2004 eftir að hafa orðið uppvís af kókaínneyslu.

Með broti sínu telst leikmaðurinn hafa brotið samning sinn við enska félagið, en hann gekk í raðir Chelsea frá Parma á Ítalíu fyrir 15 milljónir punda árið 2003.

Framherjinn var dæmdur í 7 mánaða keppnisbann eftir brot sitt og gekk í raðir Juventus árið 2005, en fór síðar til Fiorentina þar sem hann spilar enn í dag. Hann getur áfrýjað niðurstöðu dómsins.