Treysta Obama best

Stór friðarhreyfing í Bandaríkjunum hefur lýst yfir stuðningi við Barack Obama í slagnum um forsetaembættið. Talsmenn félagsins, sem kallað er MoveOn.org, segja að félagsmenn séu 3,2 milljónir manna og segjast samstundis ætla að hefja áróður á meðal sinna manna til að veita Obama brautargengi. Eins og kunnugt er á Obama þessa dagana í mikilli baráttu við Hillary Clinton, öldungardeildaþingmann frá New York um útnefningu demokrata sem forsetaefni.

Talsmenn MoveOn.org segjast treysta best Obama til að binda enda á stríðið í Írak, tryggja almenningi heilbrigðisþjónustu, takast á við loftslagsbreytingar og endurreisa traust alþjóðasamfélagsins á Bandaríkjunum.

Bæði demókratar og repúblikanar halda kosningar í tuttugu fylkjum á næsta þriðjudag, sem oft er kallaður Super Tuesday. Obama hefur hingað til haft yfirhöndina en kosningaspár benda til þess að Clinton muni hafa betur á þriðjudaginn. Öldungadeildaþingmaðurinn John McCain hefur hins vegar yfirhöndina hjá repúblikönum eftir góðan árangur í Flórída. Aðal keppinautur hans, Mitt Romney, fyrrverandi ríkisstjóri frá Massachusetts, veitir honum þó harða keppni.