Þúsundir flýja höfuðborg Tsjad

Mörg þúsund íbúar hafa flúið höfuðborg Tsjad í dag eftir hörð átök síðustu daga. Stjórnarher landsins tókst í morgun að leysa umsátur uppreisnarmanna í kringum forsetahöllina í höfuðborginni og segist hafa rekið þá á flótta. Uppreisnarmenn segjast hins vegar hafa dregið sig til baka í úthverfi borgarinnar til að skipuleggja frekari áhlaup. Enn er barist í úthverfunum og segja vitni fjölmörg lík liggja á götum úti.

Öryggisráð Sameinuðu þjóðanna hefur beint þeim tilmælum til þjóða í ráðinu að þau komi stjórninni í Tsjad til hjálpar. Tsjad er fyrrverandi nýlenda Frakka sem eru með herstöð í landinu. Sendiherra Frakka hjá SÞ segir þó enn of snemmt að segja til um hvort Frakkar blandi sér í átökin.