Mikil spenna fyrir forkosningarnar á morgun

Á morgun þriðjudag gæti orðið ljóst hverjir verða frambjóðendur demókrata og repúblikana í forsetakosningunum seint á þessu ári í Bandaríkjunum. Kosið verður í 24 ríkjum þar á meðal tveimur hinna fjölmennustu, Kaliforníu og New York.

Staðan í Kaliforníu langfjölmennasta ríki landsins er spennandi en þar mælist nú ekki marktækur munur á þeim Barak Obama og Hillary Clinton hjá demókrötum en Obama er með örlítið forskot. John McCain og Mitt Romney mælast hnífjafnir hjá repúblikönum með 38 prósent atkvæða hvor í Kaliforníu. McCain hefur hins vegar mikla yfirburði yfir Romney á landsvísu.

Í New York er Clinton með nokkra forystu á Obama enda um heimaríki hennar að ræða. Á landsvísu hins vegar hefur Obama dregið Clinton uppi og þar mælist fylgi þeirra nú nær jafnt. Telja fréttaskýrendur að fylgi Johns Edwards hafi sveiflast til Obama. McCain mælist með nokkuð meira fylgi en Romney í New York.

Enn einn meðlimur Kennedy-fjölskyldunnar hefur lýst yfir stuðningi við Barak Obama en það er Maria Shiver, eiginkona Arnolds Schwarzenegger, ríkisstjóra Kaliforníu. Hann aftur á móti er dyggur stuðningsmaður John MCain. Það gætu því orðið athyglisverðar umræður við morgunverðarborðið í ríkisstjórabústaðnum á næstunni.