Sambandið skorti kjark til að ráða mig

Luiz Felipe Scolari hefur upplýst að hann hafi verið tilbúinn að taka við enska landsliðinu eftir að hafa átt fund með forráðamönnum enska knattspyrnusambandsins fyrir tveimur árum síðan.

Hann segir hinsvegar að sambandið hafi skort kjark til að ganga frá ráðningunni og hafi gefið eftir pressu frá fjölmiðlum þegar það réði Steve McClaren til að taka við af Sven-Göran Eriksson.

"Ég var samningsbundinn portúgalska landsliðinu á þeim tíma og ég vildi auðvitað ekki semja við enska sambandið fyrir HM - vitandi það að liðin gætu mæst á HM. Sú varð líka raunin á sínum tíma," sagði Scolari í samtali við Sun.

"Ég hefði samt alveg geta skrifað undir bindandi samning um að taka við enska landsliðinu eftir heimsmeistaramótið, en enska sambandið vildi ráða mann sem það gæti tilkynnt strax af því það var undir gríðarlegri pressu frá fjölmiðlum um að ráða mann strax. Ég gat því ekki samið undir þeim kringumstæðum, en ég óska vini mínum Fabio Capello alls hins besta með landsliðið og sé ekki eftir neinu," sagði Scholari.