Dópmál gegn Jóhannesi í Kompás fellt niður

Mál sem lögreglan höfðaði gegn Jóhannesi Kr. Kristjánssyni ritstjóra fréttaskýringarþáttarins Kompás hefur verið fellt niður. Málið tengist fíkniefnum sem Jóhannes keypti en skilaði inn til lögreglu.

Í umræddum þætti var fjallað um hversu auðvelt aðgengi er að fíkniefnum á Íslandi í dag. Kompásmenn keyptu lítilræði af fíkniefnum sem var síðan skilað inn til lögreglunnar. Í kjölfarið var Jóhannes birt ákæra fyrir vörslu fíkniefna.

Atli Gíslason lögmaður blaðamannafélagsins á þessum tíma mótmælti kröfunni fyrir hönd Jóhannesar og fór fram á að ákæran yrði felld niður, það hefur nú verið gert.

Jóhannes segist fagna niðurstöðunni í samtali við Vísi. „Okkur hefur alltaf fundist fáránlegt að lögreglan hafi íhugað að ákæra okkur vegna þessa máls. Við teljum það samfélagslega skyldu okkar að sýna almenningi hversu auðvelt það er að nálgast fíkniefni."