Erlendir ríkisborgarar nærri sjö prósent landsmanna

Ríflega 21.300 erlendir ríkisborgarar voru skráðir hér á landi við upphaf þessa árs samkvæmt tölum Hagstofunnar. Hafði þeim fjölgað úr nærri 18.600 frá upphafi árs 2007.

Reyndist hlutfall erlendra ríkisborgara af heildarmannfjölda 6,8 prósent í byrjun árs 2008 en var sex prósent árið áður. Hagstofan bendir þó á að þessum tölum megu þó taka með þeim fyrirvara að það getur dregist að útlendingar sem fá dvalarleyfi séu skráðir hjá þjóðskrá og á sama hátt geta liðið nokkrir mánuðir þar til einstaklingar sem flytjast af landi brott eru felldir úr íbúaskrá.

Hlutfall erlendra ríkisborgara hvergi hærra á Norðurlöndum

Fjölgun erlendra ríkisborgara á milli ára er 15,5 prósent sem er minna en árin tvö þar á undan. Erlendum ríkisborgurum fjölgaði um rúmlega þriðjung árið 2006 og tæplega 30 prósent árið 2005

Bent er á að hlutfall erlendra ríkisborgara af heildarmannfjölda á Íslandi sé nú hærra en á hinum Norðurlöndunum en árið 2006 var hlutfall erlendra ríkisborgara næst hæst í Svíþjóð, 5,4 prósent. Hafa ber þó í huga að á hinum Norðurlöndunum er lengri hefð fyrir komu innflytjenda og því fleiri sem fengið hafa ríkisfang í nýja landinu.

Fram til ársins 2003 voru konur jafnan fjölmennari en karlar í hópi erlendra ríkisborgara. Síðan 2004 hafa karlar hins vegar verið mun fjölmennari en konur meðal erlendra ríkisborgara. Í árslok 2007 voru karlar með erlent ríkisfang rúm átta prósent allra karla en konur með erlent ríkisfang 5,5 prósent allra kvenna.