38 látast í jarðskjálfta í Rúanda og Kongó

Tveir snarpir jarðskjálftar urðu að minnsta kosti 38 manns að bana í Afríkuríkjunum Rúanda og Kongó í dag. Skjálftarnir voru 5,0 og 6,0 á Richter og urðu á virku eldfjallasvæði í afríska sprungudalnum. Auk þeirra sem létu lífið slösuðust að minnsta kosti 550.

Fjöldi bygginga hrundi í bænum Búkavú í Kongó. Þetta svæði kom mjög við sögu á tíma þjóðarmorðanna í Rúanda fyrir fjórtán árum. Nú ríkir mikil skelfing á svæðinu því eftirskjálftar eru tíðir.

Í desembermánuði árið 2005 varð öflugur skjálfti á þessu svæði upp á 6,8 á Richter. Þrátt fyrir töluverða virkni í jörðu hafa harðir jarðskjálftar ekki verið tíðir á síðustu árum.