Bæjarstjóri stal hundi og sagði af sér

Bæjarstjóri í bænum Alice í Texas hefur sagt af sér eftir að hafa haldið hundi nágranna sins í leyfisleysi og logið því að hundurinn af Shih Tzu kyni hefði drepist. Nágrannarnir höfðu beðið Grace Saenz-Lopez bæjarstjóra að líta eftir Puddles á meðan þau fóru í frí. Á meðan þau voru í burtu hringdi hún í þau og sagði að hann væri dauður. 

Hundurinn sem Grace hafði gefið nafnið Panchito sást síðar á snyrtistofu fyrir hunda og á heimili systur hennar.

Í fyrirtöku um forsjá hundsins á morgun verður ákveðið hver mun halda honum.

Saenz-Lopez hafði tilkynnt lögreglu að Puddles væri týndur. Hún var ákærð 18. janúar í tveimur liðum fyrir að eiga við og fela sönnunargögn.

Í afsagnarbréfi sem birt var í dagblaði bæjarins Echo-News baðst Saenz-Lopez afsökunar á atvikinu.

"Ég get sagt ykkur að ég gerði á þeim tíma það sem ég hélt að væri best fyrir Panchito og það sem mér fannst rétt í hjarta mínu," skrifaði hún.

"Það var aldrei ætlun mín að varpa neikvæðri athygli á borgina okkar."