Newcastle úr fallsæti með sigri á West Brom

Newcastle vann gríðarlega mikilvægan 2-1 sigur á West Bromwich Albion á heimavelli sínum í kvöld. Þetta var eini leikur kvöldsins í ensku úrvalsdeildinni.

Joey Barton var í byrjunarliði Newcastle og kom liðinu yfir snemma leiks með marki úr vítaspyrnu sem dæmd var eftir að brotið var á Shola Ameobi. Obafemi Martins hélt upp á 24 ára afmæli sitt í dag með því að skora annað mark Newcastle.

Ishmael Miller minnkaði muninn fyrir West Brom en fleiri urðu mörkin ekki og Newcastle vann sinn fyrsta sigur í átta leikjum. West Brom er í 13. sæti deildarinnar en Newcastle er stigi á eftir í 16. sæti.