Bráðkvaddur á Leikvangi ljóssins

Alan Thompson, sextugur stuðningsmaður Sunderland, fékk hjartaáfall og lést á heimavelli liðsins rétt fyrir grannaslaginn gegn Newcastle um síðustu helgi.

Thompson hafði verið stuðningsmaður Sunderland alla sína ævi og segir sonur hans að faðir sinn hefði líklega ekki geta valið sér betri stað en Leikvang ljóssins til að kveðja.

"Hann hefur eflaust verið sáttur við staðsetninguna, en ég er viss um að hann hefði viljað sjá leikinn áður en hann dó. Hann var á vellinum þegar Sunderland lagði Newcastle síðast og hann spáði því að liðið myndi vinna 2-1 þennan dag," sagði 18 ára gamall sonur Thompson í samtali við Sunderland Echo.

Þannig fór að Sunderland vann 2-1 sigur í leiknum, en það var fyrsti sigur liðsins á heimavelli í grannaslagnum í 28 ár.