Roma á eftir Ljungberg

Ítalskir fjölmiðlar halda því fram í dag að úrvalsdeildarliðið Roma sé ekki langt frá því að lokka Freddie Ljungberg til félagsins.

Ljungberg er á mála hjá Íslendingaliðinu West Ham en hann er talinn vera falur fyrir tvær milljónir punda. Þá er því einnig haldið fram að Ljungberg sé að þiggja 90 þúsund pund í vikulaun hjá West Ham. Björgólfur Guðmundsson, eigandi West Ham, er sagður gjarnan vilja lækka launakostnað félagsins.

Samkvæmt fregnum ítalskra fjölmiðla liggur þriggja ára samningur á borðinu fyrir Ljungberg og eru forráðamenn Roma vongóðir um að ganga frá málinu eftir að EM lýkur.