Ríkissaksóknari rannsakar starfsemi bankanna

Björn Bjarnason dómsmálaráðherra hefur falið ríkissaksóknara að hafa forystu um að gera skýrslu um stöðu og starfsemi íslenskra peninga- og fjármálastofnana. Þetta kom fram í ræðu ráðherra á Alþingi í dag.

Með skýrslunni á að afla staðreynda um starfsemi bankanna þriggja sem féllu í síðustu viku og tilfærslu eigna, einkum á síðustu mánuðum starfseminnar. Markmiðið er að kanna, hvort refsiverð háttsemi hafi átt sér stað sem gefi tilefni til lögreglurannsóknar. Skýrslan á að liggja fyrir eigi síðar en í árslok. Björn leggur til að Ríkissaksóknari njóti aðstoðar fulltrúa frá embætti skattrannsóknarstjóra, Fjármálaeftirliti og Ríkisendurskoðun.

Þá semur ráðuneyti Björns frumvarp að sérstakri löggjöf um að stofnað verði tímabundið rannsóknarembætti, sem taki við rannsókn á kærum um meinta refsiverða verknaði, sem sprottnir eru af eða tengjast falli bankanna.

Gert er ráð fyrir að ráðinn verði sérstakur forstöðumaður embættisins sem myndi starfa í nánu samstarfi við hverja þá opinbera stofnun, innan lands og utan, sem aðstoðað getur við að upplýsa málið. „Embættið starfaði undir forræði ríkissaksóknara, sem gæti ásamt forstöðumanni, ákvarðað, hvaða rannsóknarefni féllu til þess. Það mun að sjálfsögðu verða undir alþingi komið, hvernig lög um þetta efni verða í endanlegri mynd, en hitt er ljóst af minni hálfu, að réttarvörslukerfið getur ekki brugðist við auknu álagi vegna þessara atburða, án þess að gripið sé til sértækra aðgerða," sagði Björn.

Björn sagði enn fremur að við setningu laga um þetta efni væri eðlilegt að velta því fyrir sér hvort koma ætti á fót samráðs- og eftirlitsnefnd með fulltrúum allra þingflokka, sem hitti forstöðumann hins nýja embættis reglulega og gæti í þeim trúnaði, sem bæri að virða, fylgst með framvindu mála.

„Við núverandi aðstæður er nauðsynlegt að gera allt, sem skynsamlegt er, til að efla traust á þeim innviðum, sem eru meginstoðir réttarríkisins. Þá er afar mikilvægt að ekki sé hrapað að neinu eða gefa sér í anda nornaveiða, að lög hafi verið brotin. Ég heiti á samstöðu þingmanna um úrlausn hinna brýnu verkefna, sem við íslensku þjóðinni blasa á þessari örlagastundu," sagði Björn.