Clinton og Obama vongóð

Of jafnt er á milli Hillary Clinton og Barack Obama til að segja nokkuð um úrslit Demókrata, jafnvel ekki fyrr en eftir um mánuð. Öfugt við sigurvegara Repúblíkana er sigur þess sem tilnefndur er fyrir Demókrata byggður á fjölda kjörmanna.

Hillary Clinton hefur nú 825 kjörmenn en Barack Obama 732.

Clinton talaði við stuðningsmenn sína í New York í gærkvöldi og sagði: „Metfjöldi kaus í dag. Þið kusuð ekki aðeins til að skrifa söguna heldur til að endurbyggja Ameríku."

Í ræðu sinni talaði hún um valdatíma George Bush: „Eftir sjö ár með forseta sem hlustar aðeins á sérstök hagsmunamál eruð þið tilbúin fyrir forseta sem færir gildi ykkar og drauma í Hvíta Húsið."

„Ég veit að við erum tilbúin," sagði hún að lokum.

Í Chicago talaði Obama við stuðningsmenn sína undir tónum U2 lagsins It´s a beautiful day. Hann sagði sinn tíma vera kominn og að breyttir tímar væru fram undan. „Við þurfum ekki endanleg úrslit til að vita það sem við vitum í kvöld," sagði hann og vísaði til þess að ekki var búið að telja öll atkvæði „Okkar tími er kominn."