Clinton og McCain eru sigurvegarar forkosninganna í nótt

Bandarískir fjölmiðlar segja nú að John McCain og Hillary Clinton hafi unnið forkosningarnar í Kaliforníu fjölmennasta ríki Bandaríkjanna þótt enn eigi eftir að telja þar töluverðan hluta atkvæða

Gangi þetta eftir eru þau tvö óumdeilanlega sigurvegarar í forkosningunum sem haldnar voru í 24 ríkjum Bandaríkjanna í gærkvöldi og nótt. Hillary Clinton sigraði í New York næstfjölmennasta ríkinu og sjö öðrum. Barak Obama sigraði hinsvegar í 13 ríkjum og staða þeirra hvað kjörmenn varðar er næstum jöfn þar sem þeir eru valdir hlutfallslega. Því stefnir í að forsetaefni Demókrataflokksins sjá ekki dagsins ljós fyrr en snemma í vor.

Línurnar eru mun skýrari hjá Repúblikanaflokknum. Þar hefur John McCain svo gott sem tryggt sér útnefningu flokksins. Með sigri sínum í Kaliforníu hefur McCain tryggt sér sigur í tíu ríkjum þar á meðal New York.

Það sem helst kom á óvart í þessum forkosningum var sigur Mike Huckabee í fimm ríkjum Suðurríkjanna en búið var að afskrifa hann í þessari baráttu. Hann segir nú að hann muni berjast áfram. Mitt Romney sigraði í sjö ríkjum en staða hans er slæm í baráttunni um útnefningu flokksins þar sem fé hans er á þrotum.