Yorke áfram hjá Sunderland

Dwight Yorke hefur skrifað undir nýjan samning við Sunderland sem gildir til loka næsta tímabils.

Yorke er 36 ára gamall og lék með Manchester United á hátindi ferilsins. Hann fór til Ástralíu og lék með Sydney FC um tíma en gekk til liðs við Sunderland í ágúst árið 2006.

„Reynsla hans bæði innan sem utan vallar er ómetanleg," sagði Roy Keane stjóri Sunderland og fyrrum liðsfélagi Yorke hjá United.

„Það er frábært að vera með svona mann í búningsklefanum og á æfingasvæðinu. Hann mun þar að auki gegna hlutverki í liðinu á næstu leiktíð."

Yorke kom við sögu í 21 leik í úrvalsdeildinni á síðustu leiktíð sem varnarsinnaður miðjumaður og átti stóran þátt í því að Sunderland hélt sæti sínu í deildinni.