West Ham að styrkja sig

West Ham hefur fengið ítalska sóknarmanninn David di Michele og Kongómanninn Herita Ilunga á lánssamningum út tímabilið. Enska knattspyrnusambandið á þó enn eftir að staðfesta skiptin.

Di Michele er 32 ára og er á mála hjá Torino á Ítalíu en Ilunga er 26 ára vinstri bakvörður sem er samningsbundinn Toulouse í Frakklandi. Di Michele á sex landsleiki að baki fyrir ítalíu en hann hefur víða komið við. Hjá Udinese naut hann mestrar velgengni en hann skoraði 15 mörk í 37 leikjum tímabilið 2004-05.

Þá er West Ham í viðræðum við Stephen Appiah, miðjumann frá Gana. Þessi 27 ára leikmaður fékk sig lausan undan samningi sínum við Fenerbahce nýverið.

Fyrr í sumar klófesti West Ham þá Valon Behrami og Jan Lastuvka.