Redknapp kann ekki að útskýra viðsnúning Tottenham

Harry Redknapp stjóri Tottenham hefur viðurkennt að hann hafi ekki hugmynd um hvað sé að baki ótrúlegum viðsnúningi liðsins síðan hann tók við af Juande Ramos.

Tottenham var langneðst í úrvalsdeildinni og hafði ekki unnið sigur í átta leikjum þegar Ramos var látinn fara, en hefur ekki tapað síðan Redknapp tók við. Þar af hefur liðið nælt í 10 af 12 mögulegum stigum í deildinni og er komið af fallsvæðinu.

Mikið hefur verið gert úr viðsnúningi liðsins sem að mestu er skrifaður á Redknapp, en hann segir enga töfraformúu á bak við viðsnúninginn.

"Ég veit ekki hvað ég er búinn að gera. Ég er rétt að kynnast leikmönnunum, en ég sagði þeim að hafa trú á sjálfum sér. Við erum með mikið af góðum leikmönnum og æfingasvæðið er orðið líflegri staður en það var áður. Fyrir nokkrum vikum vorum við aðeins með tvö stig og áttum á hættu að lenda í verulegum vandræðum, en deildin er gríðarlega jöfn ef undan eru skilin bestu fjögur liðin. Þau eru í algjörum sérflokki," sagði Redknapp.