Berbatov orðinn leikmaður Manchester United

Heimasíða Tottenham hefur staðfest að félagið hafi selt búlgarska sóknarmanninn Dimitar Berbatov til Manchester United. Kaupverðið er 30,75 milljónir punda.

United hefur lengi verið á eftir þessum 27 ára leikmanni og það gekk ekki þrautalaust að fá hann. Berbatov stóðst læknisskoðun á Old Trafford í dag.

„Þetta er draumur að rætast hjá mér. Ég hlakka til að hjálpa liðinu að vinna fleiri titla á komandi árum," sagði Berbatov. Sir Alex Ferguson sagði að koma hans gæfi United nýja kosti og sagðist viss um að hann yrði vinsæll meðal stuðningsmanna.

Frazier Campbell mun ganga til liðs við Tottenham á lánssamningi út tímabilið sem hluti af samningnum. Þá hefur Tottenham ákveðið að draga til baka kvörtun sína til enska knattspyrnusambandsins vegna tilrauna Manchester United til að ná í Berbatov.