Brotist inn hjá Lucas Leiva

Brotist var í vikunni inn á heimili Lucas Leiva og bætist hann þar með í fjölmennan hóp leikmanna Liverpool sem hafa orðið fyrir barðinu á innbrotsþjófum.

Innbrotið átti sér stað á meðan að leik Liverpool og Atletico Madrid í Meistaradeildinni fór fram. Á undanförnum átján mánuðum hefur það ítrekað gerst að brotist sé inn á heimili leikmanna á meðan þeir eru fjarverandi með Liverpool.

Til að mynda hefur verið brotist inn á heimili Steven Gerrard, Dirk Kuyt, Pepe Reina, Daniel Agger og þeirra Peter Crouch og Jerzy Dudek sem nú eru farnir frá félaginu.

Meðal þess sem var stolið af heimili Leiva er bronsmedalía hans sem hann vann á Ólympíuleikunum í Peking í sumar.