Defoe útilokar að snúa aftur til Tottenham

Framherjinn Jermain Defoe hjá Portsmouth útilokar að hann muni ganga aftur í raðir Tottenham á hæla knattspyrnustjórans Harry Redknapp sem fékk hann til Portsmouth á sínum tíma.

Defoe hefur blómstrað síðan hann flutti suður á bóginn og skorar grimmt. Hann segist ekki sjá ástæðu til að flytja aftur til Lundúna þrátt fyrir augljósa tengingu sína við Harry Redknapp.

"Ég er leikmaður Portsmouth og ætla mér að vera það áfram. Tony Adams er að setja stimpil sinn á liðið og það hefur verið gaman á æfingum undanfarið. Því ætti ég að hugsa um að fara héðan? Auðvitað fékk Harry Redknapp mig hingað á sínum tíma og ég þekki hann frá því við vorum saman hjá West Ham og því er eðlilegt að blöðin velti þessu fyrir sér," sagði Defoe.