Þriðja tap Hull í röð

Hull tapaði í dag sínum þriðja leik í röð í ensku úrvalsdeildinni er liðið tapaði fyrir Bolton á heimavelli, 1-0. Bolton hoppaði upp um níu sæti í deildinni með sigrinum.

Þá vann Everton sigur á West Ham á útivelli, 3-1, þökk sé þremur síðbúnum mörkum. Auk þess vann Portsmouth sigur á Sunderland á útivelli, 2-1.

Matthew Taylor skoraði sigurmark Bolton á 50. mínútu í dag eftir að varnarmenn Hull reyndu að hreinsa í burtu hornspyrnu Bolton.

Þetta var þriðja tap Hull í deildinni en nýliðarnir byrjuðu einkar vel í haust. Liðið heldur þó sjötta sætinu en Everton er nú tveimur stigum á eftir Hull, þökk sé ótrúlegum sigri á West Ham í dag.

Varamaðurinn Jack Collison kom West Ham yfir á 63. mínútu leiksins og var ekki mikið útlit fyrir annað en að það myndi reynast sigurmark leiksins.

Á 83. mínútu jafnaði svo Jolean Lescott metin fyrir Everton með skalla eftir fyrirgjöf Louis Saha. Aðeins mínútu síðar var Saha sjálfur að verki en hann skoraði með skoti sem hafði viðkomu í varnarmanni West Ham.

Saha innsiglaði svo ótrúlegan 3-1 sigur á West Ham með góðu skoti á 87. mínútu og urðu það lokatölur leiksins.

Everton er sem fyrr segir í sjöunda sæti deildarinnar með átján stig. West Ham er því enn með þrettán stig í ellefta sæti deildarinnar.

Portsmouth kom sér upp í áttunda sæti deildarinnar með sigrinum á Sunderland sem er í sautjánda sæti með tólf stig. Bolton hoppaði úr átjánda sæti deildarinnar í það níunda með sigrinum en liðið er með fjórtán stig.

Grétar Rafn Steinsson lék allan leikinn fyrir Bolton en Heiðar Helguson sat á varamannabekk liðsins.

Djibril Cisse kom Sunderland yfir gegn Portsmouth strax á fjórðu mínútu leiksins en Nadir Belhadj jafnaði metin í upphafi síðari hálfleiks.

Það var svo á lokamínútu leiksins að El Hadji Diouf braut á Glen Johnson í vítateig heimamanna og tryggði Jermain Defoe Portsmouth sigurinn með marki úr vítaspyrnu.

Hermann Hreiðarsson var ekki í leikmannahópi Portsmouth í dag.