Nasri tryggði Arsenal sigur á United

Samir Nasri skoraði tvö mörk fyrir Arsenal er liðið vann 2-1 sigur á Manchester United í stórleik helgarinnar í ensku úrvalsdeildinni. Rafael Da Silva minnkaði muninn fyrir United í lok leiksins.

Nokkrir fastamenn voru fjarverandi í liði Arsenal í dag en Emmanuel Adebayor á við meiðsli að stríða og Robin van Persie tók út leikbann. Kolo Toure hefur einnig átt við meiðsli að stríða en hann var á bekknum.

Hins vegar voru þeir Manuel Almunia, William Gallas og Abou Diaby í byrjunarliði Arsenal á nýjan leik en Almunia fór meiddur af velli undir lok leiksins eftir samstuð við Michael Carrick.

Alex Ferguson gerði eina breytingu á liði United frá síðasta deildarleik. Ji-Sung Park kom inn fyrir Nani á vinstri kantinum.

United fékk snemma óbeina aukaspyrnu í vítateig Arsenal eftir að Almunia tók upp sendingu Mikael Silvestre. Carrick tók skotið en boltinn fór framhjá.

Stuttu síðar kom Dimitar Berbatov boltanum í netið en markið var dæmt af vegna rangstöðu og réttilega svo.

Arsenal fékk líka sín færi og fékk Nicklas Bendtner boltann á góðum stað fyrir framan mark United en boltinn fór yfir markið. Stuttu síðar fékk Bendtner annað færi eftir sendingu Nasri en skalli hans fór framhjá.

Rooney komst svo í afar gott skotfæri eftir laglega sókn United en skaut hátt yfir af stuttu færi.

Það var svo á 22. mínútu að Nasri skoraði fyrra mark sitt í leiknum. Cesc Fabregas átti sendingu inn í teig sem United menn hreinsuðu beint fyrir fætur Nasri. Hann tók skot að marki og fór boltinn af Gary Neville og í markið.

Fyrri hálfleikur var afar líflegur en sá síðari var ekki gamall þegar Arsenal komst í 2-0. Eftir glæsilega sókn þar sem vörn United var leikin sundur og saman gaf Fabregas á Nasri sem var kominn í gott færi og skoraði af miklu öryggi.

Stuttu síðar átti United gott færi er Park átti góða fyrirgjöf á Cristiano Ronaldo sem hitti ekki markið.

United hélt áfram að sækja eftir þetta en sóknir liðsins báru ekki árangur fyrr en á 90. mínútu. Sending kom frá vinstri og skallaði William Gallas boltann frá en beint á Rafael. Hann tók boltann laglega niður og skoraði afar snoturt mark.

En nær komst United ekki og þar við sat. Arsenal er nú í þriðja sæti deildarinnar með 23 stig og United í því fjórða með 21 stig. United á þó enn leik til góða.