Pavlyuchenko vildi ekki fara til Tottenham

Móðir framherjans Roman Pavlyuchenko hjá Tottenham segir son sinn ekki hafa haft nokkurn áhuga á að fara til Englands í sumar. Hún segir hann hafa verið ánægðan í Rússlandi þar sem hann lék með Spartak í Moskvu.

"Roman var bara seldur frá félaginu. Hann vildi ekkert fara til Englands en það var félagið sem vildi selja hann. Ég er viss um að hann er tilbúinn að snúa aftur til Rússlands við fyrsta tækifæri," sagði móðir hans í samtali við Daily Telegraph.

Pavlyuchenko hefur skorað tvö mörk fyrir Tottenham síðan hann var keyptur á 14 milljónir punda í sumar. Eitt í deildarbikarnum og svo annað í fyrsta sigri Tottenham í deildinni gegn Bolton á dögunum.