Dvergar ræna rútubíla

Hópur ræningja hefur að undanförnu rænt rútubíla í Svíþjóð með því að senda dverga í farangursgeymslurnar falda í íþróttatöskum. Þegar inn er komið fara dvergarnir uppúr töskunum og grípa allt steini léttara.

Síðan fara þeir aftur ofan í íþróttatöskurnar og bíða eftir að sinn maður pikki upp töskuna á áfangastað. Swebus sem er sænskt rútufyrirtæki hefur upplýst um þessa aðferð þjófanna.

"Við höldum að þetta séu litlar, ungar manneskjur, líklega dvergar eða börn," segir Ingvar Ryggasjo hjá Swebus.

"Við höfum hert öryggismálin hjá okkur og ætlum að koma fyrir myndbandsupptökuvélum í farangursgeymslunum," segir Ingvar.

Hann nefnir eitt tilfelli þar sem lítilli, fingralangri manneskju var smyglað um borð í hokkítösku.

Kona ein sem ferðaðist með rútu sá tvo menn koma stórri, þungri tösku fyrir í farangursgeymslu rútunnar. Þegar hún var síðan komin heim til sín uppgötvaði hún að myndavél, veski og aðra hluti vantaði í tösku sína.

Lögreglan er að yfirheyra fólk sem passar við þessa lýsingu og er á sakaskrá vegna málsins.