Medvedev heldur fast í stefnu Pútíns

Dímítrí Medvedev, frambjóðandi Sameinaðs Rússlands til forseta, sagði í dag að hann myndi halda fast í þá stefnu sem Vladímír Pútín Rússlandsforseti hefði markað fyrir þjóðina.

Nýr forseti verður kjörinn í Rússlandi 2. mars næstkomandi og er hinn 42 ára gamli Medved, sem er náinn samstarfsmaður Pútíns, talinn mjög líklegur sigurvegari.

Medved sagði á fundi með menntaelítu Rússlands í dag að Pútín hefði dregið Rússland út úr ringlulreið eftir fall Sovétríkjanna og landið þyrfti nú á stöðugleika að halda í langan tíma til þess að ná fyrri styrk sínum.

Hann sló þó annan streng í utanríkismálum og sagði að Rússland þyrfti að byggja upp bandalög við aðrar þjóðir en Pútín hefur verið heldur herskár í yfirlýsingum sínum að undanförnu, meðal annars gagnvart vestrænum ríkjum.