Þjóðverjar skila Nokia símum

Þýskir stjórnmálamenn keppast um að skila Nokia símunum sínum eftir að finnski símaframleiðandinn ákvað að færa verksmiðju sína í Þýskalandi til Rúmeníu.

Nokia símaframleiðandinn hefur átt mikilli velgengni að fagna í Evrópu og ímynd fyrirtækisins verið björt. En ekki lengur í Þýskalandi. Í Bochum eru mótmælaspjöld við verksmiðju Nokia eftir að fyrirtækið tilkynnti að það myndi flytja farsímaframleiðslu sína frá Bochum til Rúmeníu. Tvö þúsund og þrjú hundruð störf glatast í Þýskalandi.

Starfsmissirinn fær mjög á fólk í Þýskalandi. Nokia er að byggja nýja verksmiðju í Rúmeníu og þar fagna menn nýjum störfum.

Það veitir ekki af störfum í sveitum Rúmeníu. En þýskir stjórnmálamenn segjast hver í kapp við annan hafa skilað Nokia farsímum sínum og einn segist hafa bannað Nokia á heimili sínu. Þeir hvetja fólk til að kaupa þýska síma. Það kann þó að reynast þrautin þyngri. Motorola sagðist í fyrra mundu loka verksmiðju sinni í Þýskalandi og Siemens seldi farsímaframleiðslu sína til Tævans árið 2005.