Tannlæknir býður þjónustu í gegnum netið

Jerry Watson tannlæknir í London sinnir eftirliti á sjúklingum sínum í gegnum internetið. Hann skoðar tennur þeirra í gegnum vefmyndavél og ákveður þannig hvort hann þurfi að hitta þá í eigin persónu eða ekki. Þetta gerist á læknastofu á vegum tannlæknisins þar sem myndir eru teknar og tennurnar hreinsaðar á sama tíma. Kostnaðurinn er um sex þúsund krónur.

Watson fyrirhugar nú að færa út kvíarnar og opna 20 læknastofur í Bretlandi næsta sumar. Þannig geti hann skoðað sjúklinga á fjórum læknastofum í einu.

Watson telur jafnframt að eftirlit gæti farið fram heima hjá sjúklingunum eftir einhvern tíma; „Ef fólk er með nógu góða vefmyndavél er ekkert því til fyrirstöðu." Og tannlæknirinn framsýni sér fyrir sér að í framtíðinni gætu myndavélar verið í rafmagnstannburstum; „Það væri frábært."