Thompson hættir baráttu um útnefningu Repúblíkana

Fred Thompson fyrrverandi öldungadeildarþingmaður hefur dregið sig úr kapphlaupinu um útnefningu forsetaefnis Repúblíkanaflokksins eftir slæmt gengi í forkosningum fram til þessa. Í yfirlýsingu sagðist hann vonast til að flokkurinn og þjóðin öll hefði notið einhvers af framboði hans.

Á laugardag lenti Thompson í þriðja sæti í forkosningunum í Suður-Karólínu. Hann hafði sagt að hann þyrfti að vinna þar til að geta haldið áfram. Thompson hefur ekki gefið upp hvort hann muni lýsa yfir stuðningi við einhvern keppinauta sinna.

Thompson hóf baráttuna í september, mörgum mánuðum eftir að hinir frambjóðendurnir hófu leik. Eftir að hann náði öðru sæti á landsvísu í október fór fylgi hans að dala.

Í Suður-Karólínu hafnaði hann í þriðja sæti með 16 prósent á eftir John McCain sem fékk 33 prósent og Mike Huckabee sem hlaut 30 prósent atkvæða.