Enski hefst á morgun - Upphitun fyrir leiki helgarinnar

Tæplega 100 daga bið aðdáenda enska boltans lýkur klukkan 11:30 í fyrramálið þegar Arsenal og WBA spila opnunarleikinn í ensku úrvalsdeildinni þetta árið.

Ensku úrvalsdeildinni verða sem fyrr gerð góð skil á sportrásum Stöðvar 2 og verða allir leikirnir í fyrstu umferðinni sýndir í beinni útsendingu. 

Arsenal - WBA 11:30 Sport 2 

Nýliðar WBA voru kallaðir Arsenal Championship-deildarinnar á síðustu leiktíð vegna skemmtilegs leikstíls liðsins, en þeir fá nú að reyna sig gegn Arsene Wenger og félögum á Emirates.

Hull - Fulham 14:00 Sport 6 

Nýliðar Hull City fá sömuleiðis eldskírn sína í efstu deild á morgun þegar þeir mæta Fulham á KC vellinum. Þetta verður fyrsti leikur Hull í efstu deild í sögu félagsins.

Bolton - Stoke 14:00 Sport 3 

Þriðju nýliðarnir í deildinni, gamla Íslendingafélagið Stoke City, mætir Bolton á Reebok leikvanginum. Þar eru á ferðinni tvö lið sem margir spá því að muni eiga erfitt uppdráttar í deildinni í vetur, en Stoke er nú að spila í efstu deild í fyrsta skipti síðan árið 1985.

Everton - Blackburn 14:00 Sport 4 

Leikur Everton og Blackburn verður leikur tveggja liða sem hafa ekki gert sérstaka hluti á leikmannamarkaðnum í sumar, en staða Blackburn þar hefur ekki batnað mikið eftir að félagið missti enska landsliðsmanninn David Bentley til Tottenham. Þetta verður fyrsti leikur Blackburn í deildinni undir stjórn Paul Ince sem tók við af Mark Hughes.

Middlesbrough - Tottenham 14:00 Sport 5 

Bylting Juande Ramos hjá Tottenham heldur áfram og þó lið hans verði án varafyrirliðans Robbie Keane þegar það sækir Middlesbrough heim á morgun, er mikil bjartsýni í herbúðum Lundúnaliðsins. Jafn margir bíða væntanlega eftir því hvort Luka Modric slær í gegn í sínum fyrsta leik fyrir félagið og hinir sem bíða milli vonar og ótta eftir að vita hvort búið verður að selja Dimitar Berbatov til Manchester United.

West Ham - Wigan 14:00 Sport 2 

Íslendingalið West Ham ætlar sér eflaust stóra hluti í opnunarleik sínum gegn Steve Bruce og félögum í Wigan, en Hamrarnir enduðu í 10. sæti á síðustu leiktíð. Bruce náði hinsvegar að gera ágæta hluti með Wigan og segist fullviss um að geta bætt þann árangur á komandi leiktíð.

Sunderland - Liverpool 16:15 Sport 2 

Lokaleikurinn á laugardaginn er svo viðureign Sunderland og Liverpool á Stadium of Light þar sem lærisveinar Rafa Benitez munu leitast við að byrja jafn vel og þeir gerðu á síðustu leiktíð. Það hefur þó sýnt sig að fá lið sækja gull í greipar norðanmanna á góðum degi og Sunderland hefur bætt við sig nokkrum sterkum leikmönnum í sumar.

Á sunnudag verða líka hörkuleikir þar sem liðin tvö sem flestir spá því að berjist um meistaratitilinn verða í sviðsljósinu.

Chelsea - Portsmouth 12:10 Sport 2

Luiz Felipe Scolari mun til að mynda stýra Chelsea í fyrsta sinn þegar lið hans tekur á móti Hermanni Hreiðarssyni og félögum í Portsmouth. Sjálfstraustið í Chelsea-mönnum er í botni með nýja stjórann og Frank Lampard með nýjan samning í vasanum.

Manchester City - Aston Villa 17:15 Sport 3 

Mark Hughes byrjaði leiktíðina ekki glæsilega sem stjóri Manchester City þegar lið hans tapaði fyrir danska liðinu Midtjylland í Evrópukeppninni í gær. Hann mun reyna sig gegn FH-bönunum í Aston Villa á sunnudag þar sem Gareth Barry verður væntanlega á sínum stað í liði Villa - stuðningsmönnum félagsins til mikillar ánægju.

Manchester United - Newcastle 14:40 Sport 2 

Rúsínan í pylsuendanum á sunnudaginn er svo leikur Newcastle og Manchester United þar sem meistararnir hefja titilvörnina á erfiðum leik gegn Kevin Keegan og félögum fyrir norðan.