Alfreð kom að myndun nýs meirihluta

Vísir hefur heimildir fyrir því að Alfreð Þorsteinsson, fyrrverandi borgarfulltrúi Framsóknarflokksins, hafi átt ríkan þátt í myndun nýs meirihluta í morgun. Í samtali við Vísi vildi Alfreð hvorki játa þessu né neita. Hann segir að sér lítist afskaplega vel á nýjan meirihlutann. Alfreð segir að nýi meirihlutinn þurfi að taka sér góðan tíma til að skoða mál sem snúa að REI. Hann segir að samstarfið við Sjálfstæðisflokkinn hefði orðið erfitt vegna þeirrar óeiningar sem hefði ríkt innan borgarstjórnarflokksins.

Aðspurður um það hvort kalla megi nýja borgarstjórnarmeirihlutann Alfreðsstjórnina segir hann "Ég var nú hættur í pólitík og farinn að snúa mér að öðrum verkefnum - byggingu nýs sjúkrahúss. Mér var síðan kippt út úr því verkefni af Guðlaugi Þór Þórðarsyni heilbrigðisráðherra. Þar með gafst mér tími til annarra verkefna. Það má því kannski allt eins eigna Guðlaugi heiðurinn að nýjum meirihluta," segir Alfreð.