Landsmenn að verða 313 þúsund

Landsmenn voru orðnir 312.872 þann 1. desember og hafði fjölgað um rúmlega fimm þúsund á einu ári. Þrátt fyrir þetta segir á vef Hagstofunnar að nokkuð hafi dregið úr fólksfjölgun eftir að hún var óvenju hröð undanfarin þrjú ár.

Árleg fólksfjölgun er nú 1,8 prósent samanborið við 2,6 prósent frá 1. desember 2005 til 1. desember 2006 og 2,1 prósent árið þar á undan. Þótt nú dragi úr fólksfjölgun er hún mikil hvort sem litið er til annarra þjóða eða til fyrri tímabila hérlendis. Jafn mikil fólksfjölgun hefur ekki orðið hér á landi frá því um miðbik sjöunda áratugarins og í engu öðru Evrópulandi er fólksfjölgun jafn mikil og hér. Fólksfjölgun í álfunni hefur verið um 0,2 prósent og í einungis örfáum löndum Evrópu er árleg fólksfjölgun meiri en 1 prósent.

Fólksfjölgun fremur rakin til aðstreymis frá útlöndum

Þótt náttúruleg fólksfjölgun eigi enn talsverðan þátt í fjölgun íbúa hér á landi verður fólksfjölgun undanfarin ár öðru fremur rakin til mikils aðstreymis fólks frá útlöndum, segir í frétt Hagstofunnar. Frá 1. desember í fyrra til 1. desember í ár var fjöldi aðfluttra umfram brottflutta rúmlega 3.000. Á sama tíma voru fæddir umfram dána tæplega 2.600 talsins.

Náttúruleg fólksfjölgun á árinu nam tæpu 0,8 prósent en tíðni flutningsjöfnuðar var 1,1 prósent. Talsvert hefur dregið úr flutningsjöfnuði frá því í fyrra en þá var tíðni flutningsjöfnuðar 1,8 prósent. Undanfarin ár hafa karlar verið mun fleiri en konur í flutningum til landsins enda hafa virkjana- og stóriðjuframkvæmdir og byggingariðnaður einkum höfðað til karla.

Erlendum ríkisborgurum hefur fjölgað mikið hér á landi undanfarin ár og er hlutfall þeirra af íbúum í heild er nú 6,8 prósent samanborið við 6 prósent fyrir ári. Langflestir erlendir ríkisborgarar sem búsettir eru á Íslandi eru með pólskt ríkisfang (8.350), í kjölfar þeirra fylgja Litháar (1.316), Þjóðverjar (980), Danir (903), Portúgalar (886) og einstaklingar með ríkisfang á Filippseyjum (771). Fjöldi einstaklinga með ríkisfang á Norðurlöndum hefur lítið breyst undanfarna áratugi en flestum öðrum þjóðernum hefur fjölgað til muna.