Britney Spears er ólétt

Þriðja barn Britney Spears er á leiðinni. Poppdívan trúði vinum sínum fyrir því í tölvupósti þann 14. nóvember að hún væri komin fjórar vikur á leið. Hún sagðist viss um að faðir barnsins væri upptökustjórinn J.R. Rotem, sem hún hefur átt vingott við frá því hún skildi við K-Fed, nýkjörinn sjöunda besta pabba í heimi.

Þann sextánda nóvember sendi Spears svo sónarmynd af barninu til náinna vina og fjölskyldu. In Touch segir að Rotem hafi staðfest óléttuna við tímaritið. Heimildarmaður blaðsins segir að söngkonan sé handviss um það að barnið muni hjálpa henni að bæta líf sitt. Hann segir líka að Britney sé ekki að leita að öðrum eiginmanni. Hún trúi því þó staðfastlega að Rotem verði góður faðir, jafnvel þó hann hafi ákveðið að ræða kynlíf þeirra í smáatriðum við Blender tímaritið fyrr á árinu.