Ættleidd dóttir Jolie ávöxtur nauðgunar

Eþíópísk lífmóðir hinnar tveggja ára gömlu Zahöru, sem Angelina Jolie ættleiddi, segir stúlkuna ávöxt nauðgunar. Í viðtali við breska blaðið Daily Mail lýsir hún því hvernig henni var nauðgað á leið heim úr vinnu árið 2004.

Hún leið vítiskvalir þar sem litið er á nauðgun sem skömm í Eþíópíu. Hún gat hins vegar ekki hulið óléttuna lengi og sagði móður sinni frá því sem hafði gerst. Móðir hennar studdi hana með ráðum og dáðum en fljótlega eftir að litla stúlkan fæddist var ljóst að henni væri betur borgið annars staðar.

"Ég hef alltaf þakkað fyrir að dóttir mín skildi vera ættleidd af konu eins og Angelinu Jolie. Ég óska þeim allrar velgengni í lífinu," segir Mentwabe Dawit, lífmóðir Zahöru.