Mills segir rottur geta bjargað jörðinni

Heather Mills hvatti í gær alla Breta til að bjarga jörðinni - með því að drekka rottumjólk. Hún hvatti fólk til að hætta að neyta kúaafurða. Í staðinn gætu Bretar notað rottu,- katta,- eða hundamjólk í teið sitt og út á morgunkornið.

Heather fer fyrir herferð grænmetishópsins Viva! gegn hlýnun jarðar. Hún segir 80 prósent orsaka hlýnunarinnar koma frá búpeningi þess vegna ættu jarðarbúar að gerast grænmetisætur eða eiga það á hættu að eyðileggja jörðina.

„Það er hægt að velja um 25 valkosti í mjólk," sagði Mills sem gjarnan er kölluð Mucca í Bretlandi vegna klámmynda sem hún sat fyrir á. „Af hverju drekkum við ekki rottumjólk, katta- eða hundamjólk?"

Sérfræðingar segja tillögur Mills fáránlegar. Ben Mepham prófessor og einn helsti aðili í mjólkurframleiðslu í Bretlandi sagði við breska blaðið Sun að tillögurnar væru fáránlegar. „Hvernig í veröldinni ætlarðu að ná mjólkinni út?"

Heather hélt ræðuna í Hyde Park í miðhluta London í gær. Ekki einn fulltrúi almennings mætti á opnunina.

Heather sem missti fótlegg í slysi birtist á auglýsingaskilti með slagorðinu: „Þú hefur ekki fótlegg til að standa á." Hún stillir sér upp á lostafullan hátt á öðru skilti sem segir; „Hey Kjöti, þú gerir mig svo heita."

Heather mætti í bílalest tveggja bíla. Hún drap ekki á svörtu Benz bifreiðinni sem metin er á fjórar og hálfa milljón á meðan hún veitti viðtöl.

Mills sagðist ekki mælast til þess að fólk gerðist grænmetisætur á einni nóttu, en ef það hætti að drekka kúamjólk gæti það spornað við þróuninni."

Vegfarandi sem gekk hjá sagði að auglýsingaskiltið líktist pósu úr klámblaði. „Ég trúi ekki að hún geri þetta og kvarti síðan um að vera í sviðsljósinu."

Heather berst nú fyrir að fá hluta af auðæfum fyrrverandi eiginmanns síns, Pauls McCartneys. Hún neitaði því í gær að lögmenn hennar hefðu sagt upp samningi við hana og hélt því fram að hún hefði rekið þá.