Vilja engar brúðkaupsgjafir

Brúðkaup aldarinnar fer fram á morgun. Þá verða gefin saman Jón Ásgeir Jóhannesson og Ingibjörg Pálmadóttir í Fríkirkjunni. Það er séra Hjörtur Magni sem gefur brúðhjónin saman en veislan verður haldin í Hafnarhúsinu.

Í Sirkus með Fréttablaðinu í dag kemur fram að brúðhjónin afþakki allar brúðkaupsgjafir. Í staðinn biðja þau fólk um að gefa í Sólarsjóðinn sem er góðgerðarsjóður sem þau hafa stofnað. Tilgangur sjóðsins er að styrkja börn sem eiga um sárt að binda vegna langvarandi veikinda og aðstandendur þeirra. Í bréfinu sem barst til veislugesta segir meðal annars:

"Í þeim efnum hefur okkur meðal annars dottið í hug að kaupa mætti íbúðir í Reykjavík eða London, þar sem fjölskylda barnsins getur búið saman á meðan meðferð þess stendur."

Í Sirkus kemur fram að brúðhjónin leggi sjálf til stofnframlag sjóðsins. Sólarsjóðurinn mun ekki bara styðja við bakið á langveikum börnum heldur mun þungu fargi létt af veislugestum sem hafa margir hverjir misst svefn út af brúðargjafakaupum.