Herra Ísland í Héraðsdómi

Í fyrramálið hefst aðalmeðferð í skaðabótamáli sem fyrrum Herra Ísland, Ólafur Geir Jónsson, höfðar á hendur Arnari Laufdal Ólafssyni og fegurðarsamkeppni Íslands.

Aðalmeðferðin hefst klukkan 9:15 í Héraðsdómi Reykjavíkur og stendur til 15:15. Ólafur Geir var krýndur Herra Ísland árið 2005 en var sviptur titlinum skömmu síðar vegna þess að forsvarsmönnum keppninnar fannst Ólafur ekki hegða sér sem fegursti karlmaður landsins.

Ólafur var þá með eigin sjónvarpsþátt sem bar heitið Splash og var sýndur á netinu og síðar á sjónvarpsstöðinni Sirkus. Einnig var hann liðtækur bloggari þar sem hann setti fram skoðanir sínar á hinum og þessum málefnum. Ólafur var sviptur titlinum og Jón Gunnlaugur Viggósson sem lenti í öðru sætinu krýndur Herra Ísland.

Ólafur var ekki sáttur við þessa ákvörðun og höfðaði skaðabótamál og sendi meðal annars frá sér yfirlýsingu þar sem eftirfarandi kom fram:

"Ég harma ákvörðun eigenda keppninnar Herra Ísland að svipta mig titli. Ástæðan sem mér var gefin var sú að ég hafi kynnt hjálpartæki í Splashþættinum og hafi bloggað um daginn og veginn. Farið var fram á að ég myndi hætta með sjónvarpsþáttinn, en þátturinn er starfið mitt."

Ólafur hefur hinsvegar verið nokkuð áberandi eftir keppninn og meðal annars komið fram í Næturvaktinni og Stelpunum.