135 milljarða króna samruni í Fríkirkjunni á laugardag

Stærsti samruni ársins á Íslandi fer fram í Fríkirkjunni á laugardaginn þegar Jón Ásgeir Jóhannesson og Ingibjörg Pálmadóttir ganga í það heilaga. Reikna má með að sameinuð séu þau um 135 milljarða króna virði.

Í úttekt sem tímaritið Sirkus gerði í sumar yfir 25 ríkustu Íslendingana kom fram að hreinar eignir Jóns Ásgeirs Jóhannessonar eru metnar á 105 milljarða króna. Sú eign er að svo til öllu leyti bundin í Baugi Group í gegnum eignarhaldsfélagið Gaum sem hann á ásamt systur sinni Kristínu og foreldrum sínum, Jóhannesi og Ásu Karen.

Ingibjörg var í sömu úttekt metin á 30 milljarða króna. Ingibjörg hefur efnast vel á undanförnum árum og hennar helstu eignir eru í Baugi Group og fasteignafélaginu Stoðir Group.

Eins og fram kemur er samruni þeirra Jóns Ásgeirs og Ingibjargar metinn á 135 milljarða, helmingi meira en fyrirhugaður samruni Reykjavik Energy Invest og Geysir Green Energy var metinn á. Sá samruni hefur reyndar verið slegin út af borðinu, ólíkt samruna væntanlegra brúðhjóna.