Málverk Warhols af Taylor selt á einn og hálfan milljarð króna

Málverk Andys Warhols af Elísabetu Taylor seldist á 23,7 milljónir dollara eða tæpan einn og hálfan milljarð íslenskra króna. Verkið sem gengur undir nafninu „Litaða Liz" er hluti af málverkaröð Warhols og var málað á sjöundaáratugnum.

Auk myndarinnar af Elísabetu er í myndaröðinni myndir af Marilyn Monroe og Jackie Kennedy. Á aðeins tæpum áratug hefur verðmæti myndarinnar sexfaldast en árið 2001 var „Litaða Liz" metin á fjórar milljónir dollara. Segja sérfræðingar í listaheiminum það sýna að æ vinsælla sé að fjárfesta í listmunum.