Veðramót rassskellt á Eddunni

,,Ég fékk bara góða rassskellingu, það er það eina sem hægt er að segja um þetta," sagði Guðný Halldórsdóttir leikstjóri þegar Vísir leitaði viðbragða hennar við Edduverðlaununum í gær. Mynd Guðnýjar, Veðramót, hlaut flestar tilnefningar, eða ellefu talsins. Hún hlaut einungis ein verðlaun, fyrir leik Jörundar Ragnarssonar í aukahlutverki.

,,Nei ég er nú ekki sátt við þá niðurstöðu," sagði Guðný, sem þótti hlutur kvenna á hátíðinni heldur rýr. ,,Það kom ein kona þarna upp og hún var að taka við verðlaunum sem leikkona í aðalhlutverki. Þetta er greinilega bara karlaveröldin sem við búum í."

,,Foreldrar unnu bara," segir Guðný, en kvikmyndin Foreldrar var ótvíræður sigurvegari hátíðarinnar og hirti verðlaun í öllum flokkum sem hún var tilnefnd í, þar á meðal fyrir bestu myndina.

Guðný segir að kannski hafi myndin bara ekki verið nógu góð. Veðramót hlaut fádæma lof gagnrýnenda þegar hún var frumsýnd, og kom mörgum því á óvart að hún skyldi ekki vinna til fleiri verðlauna. ,,Jú, jú, gagnrýnendum þótti myndin góð en bransanum fannst þetta vont," sagði Guðný.