Hjónabandið breytti Beckham

Sir Alex Ferguson, knattspyrnustjóri Manchester United, segir að David Beckham hafi breyst til hins verra þegar hann giftist kryddpíunni Victoriu árið 1999. Hann segir Beckham hafa verið atvinnumann fram í fingurgóma áður en hann tileinkaði sér stjörnulífið.

"David var aldrei til vandræða fyrr en hann gifti sig. Hann átti það til að vera á æfingum fram á nótt og var frábær ungur maður. Það var erfitt fyrir hann að taka skrefið inn í að verða ofurstjarna og eftir að hann gifti sig var líf hans aldrei hið sama. Hann er orðinn svo frægur núna að knattspyrnan er orðin aukaatriði. Beckham var alltaf í besta mögulega formi en það breyttist eftir að hann fór í poppið með konunni. Það var eins og hann breyttist í aðra manneskju," sagði Ferguson.

Gamli þjálfarinn hans er heldur ekki á því að Beckham nái að breyta knattspyrnunni í Bandaríkjunum. "Stór nöfn í knattspyrnunni hafa áður farið til Bandaríkjanna og nægir þar að nefna menn eins og Pele, Cryuff og Beckenbauer. Þessir menn náðu ekki að breyta knattspyrnunni þar til góða og því á ég erfitt með að sjá að þetta verði eitthvað öðruvísi með David. Það er nú einu sinni þannig að bestu leikmennirnir sem koma upp í Bandaríkjunum fara allir úr landi til að spila eins og í mörgum öðrum löndum," sagði Ferguson og benti á að landafræðin gerði Bandaríkjamönnum líka erfitt fyrir.

"Svo er Ameríka líka svo stór að það gerir stuðningsmönnum það ókleift að fylgja liðum sínum í útileiki. Það getur því aldrei myndast jafn góð stemming í Bandaríkjunum og t.d. á Englandi," sagði Ferguson. "Menn gætu auðvitað skipt landinu upp í riðla, en það eru bara ekki nógu mörg lið til að gera það."