Vísa ummælum formanns Geðlæknafélagsins á bug

Ummæli formanns Geðlæknafélags Íslands um að framlög ríkisins til geðfatlaðra hafi brunnið upp í verðbólgunni eru fjarri lagi. Þetta kemur fram í tilkynningu frá félagsmálaráðuneytinu. Þar segir ennfremur að rangar upplýsingar séu ekki til þess fallnar að greiða götu átaks í þágu geðfatlaðra.

Í tilkynningunni segir að ríkisstjórnin hafi ákveðið að leggja til einn milljarð króna af söluandvirði Símans og 500 milljónir úr Framkvæmdasjóði fatlaðra til stofnkostnaðar og uppbyggingar á þjónustuúrræðum. Átakið hafi hafist í ársbyrjun 2006 með því að gerð var verkáætlun um framvindu þess og greining á þjónustuþörf. Sú greining hafi síðan leitt í ljós að þörf væri fyrir sértæka búsetuþjónustu og önnur stoðúrræði fyrir 160 einstaklinga.

Í tilkynningunni er vísað í ummæli formanns Geðlæknafélag Íslands í fjölmiðlum þar sem hann sagði að skýrslugerðir vegna framlaga ríkisins hafa kostað tugi ef ekki hundrað milljónir. Þá sagði hann ennfremur að allt of mikið af framlögum ríkisins hafi brunnið upp í verðbólgunni.

Ráðuneytið vísar þessum ummælum á bug og segir það fjarri lagi að fjárframlög hafi orðið verðbólgunni að bráð. Þar segir að rekstur verkefnisins sé ekki fjármagnaður með framangreindum framlögum að fjárhæð 1,5 milljarði króna. Segir ennfremur að rangar upplýsingar af þessu tagi séu ekki til þess fallnar að greiða götu átaks í þágu geðfatlaðra. Verkefnið sé á áætlun og á vegum þess hafi nú þegar verið tryggt húsnæði fyrir 68 einstaklinga af þeim 160 sem verkefnið tekur til.